Калин Ивановски се пласира во четвртфиналето на тенискиот фјучерс во Загреб, кој се игра на земјени терени и за награден фонд од 30.000 американски долари, со победата од 7-6 (8), 7-5 над Гркот Павлос Циципас по 2:13 часа игра во второто коло.
Ивановски, неделава 1147. на АТП-листата во сингл, водеше рововска битка без ниту еден брејк во првиот сет со помладиот брат на еден од најдобрите светски тенисери Стефанос Циципас, а во вториот дури во 11. гем му го одзеде сервисот на 20-годишниот ривал рангиран на 1.037 место во светот за водство од 6-5, а потоа отсервира за победа.
Негов противник во четвртфиналето утре од 10 часот ќе биде Хавиер Баранко Косано (423.) од Шпанија.
Меѓу осумте најдобри во Загреб се најде и Украинецот со македонски пасош Олег Приходко (410.), кој виде мака за да го оправда статусот на прв носител против Глиб Секачов (1359.) од Украина, славејќи со 6-0, 4-6, 6-4 по 2:11 часа игра.
Следна пречка на репрезентативецот на Македонија во Дејвис купот од мај годинава ќе биде Димитрис Сакеларидис (653.) од Грција утре од 10 ч.