Со победата над домаќинот Луксембург од 25:17, Македонија избори учество на Европското првенство за ракометари до 18 години што ќе се одржи од 29 јули до 9 август 2026 година во Србија.
Услуга за првото место во квалификациската група Ц на избраниците на селекторот Горан Кузманоски им направи Финска, која ја победи Грција со 29:25 и си обезбеди место на ЕП заедно со „црвено-жолтите“.
Македонија, Финска и Грција освоија по 4 бода, а јужниот македонски сосед отпадна поради помалку дадени голови од Финците.
Клучен за пласманот на еврошампионатот се покажа стартниот триумф над Финска од 36:29, а во второто коло Македонија загуби „добиен“ натпревар со Грците со 32:31.