Повеќе од две третини од граѓаните на Европската унија веруваат дека нивната земја нема да може воено да се одбрани од руски напад, покажува најнова анкета објавена само неколку дена откако рускиот претседател Владимир Путин изјави дека Русија е „подготвена веднаш“ да се соочи со Европа.
Анкетата спроведена од агенцијата „Кластер 17“ за „Ле гранд континент“ опфатила 9.500 луѓе од девет земји-членки на ЕУ. Резултатите покажуваат дека 69 проценти од испитаниците не веруваат дека нивната земја е способна да ја заштити својата територија од можна руска агресија, пренесува Евроњуз.
Французите покажаа највисоко ниво на доверба во сопствената војска, при што 44 проценти од испитаниците веруваат дека нивната војска би можела да одговори на руски напад, но мнозинството (51 процент) остана скептично. Од друга страна, Белгија, Италија и Португалија забележаа најниско ниво на доверба, при што повеќе од 85 проценти од испитаниците не веруваат во одбранбените капацитети на своите земји.
Авторите на истражувањето истакнуваат дека географската локација значително влијае на перцепциите на граѓаните. Земјите што се физички подалеку од Русија имаат помала доверба во својата подготвеност, бидејќи веруваат дека е помала веројатноста да бидат вклучени во директен воен конфликт.
Анкетата е спроведена во Франција, Хрватска, Германија, Полска, Холандија, Шпанија, Португалија, Италија и Белгија во време кога ЕУ инвестира стотици милијарди евра во одбрана и спроведува масовно вооружување.