Постери со фотографии од хрватскиот премиер Андреј Пленковиќ и министерот за надворешни работи Гордан Грлиќ Радман се појавија во излог во деловен центар во Дубровник, јавуваат хрватски медиуми.
На постерите пишува „БАРАНИ за учество во геноцидот во Палестина“ и се повикува на „раскинување на договорот ЕУ-Израел“.
Стилот потсетува на потерници, со илустрации на двајцата функционери покрај полициски линии за мерење на висина.
Сè уште не е познато кој стои зад постерите или кога точно биле поставени, но тие се појавија пред пристигнувањето на високи гости на Дубровничкиот форум, кој традиционално се одржува на 11 и 12 јули. Премиерот Андреј Пленковиќ е најавен како учесник на овогодинешниот Дубровнички форум.
Постерите очигледно се реакција на надворешнополитичкиот став на Хрватска и Европската Унија кон војната во Газа.