Пекинг денеска ги посочи САД, Израел и нивните операции против Иран како „главна причина“ за блокадата на Ормутскиот теснец, велејќи дека итен прекин на непријателствата е единствениот начин за повторно воспоставување на поморскиот сообраќај.
Вака Пекинг реагираше на првото обраќање на американскиот претседател Доналд Трамп до нацијата од почетокот на израелско-американската офанзива против Иран на 28 февруари.
Трамп вети дека Соединетите Држави ќе продолжат да го напаѓаат Иран „исклучително силно во следните две до три недели“. Тој ги повика и земјите кои набавуваат нафта преку Ормутскиот теснец да преземат контрола над неа.
Иранската блокада на теснецот се одрази на глобалната економија и ја погоди Кина. Според аналитичката фирма Кплер, повеќе од половина од увозот на сурова нафта од Кина доаѓа од Блискиот Исток и повеќето минуваат низ теснецот.
Неколку кинески авиокомпании, вклучително и националниот авиопревозник Ер Чајна, најавија неизбежни зголемувања на доплата на гориво на домашните летови бидејќи војната ги зголемува цените на керозинот.
„Главната причина за нарушувањата на навигацијата во Ормутскиот теснец лежи во илегалните воени операции спроведени од САД и Израел против Иран“, рече портпаролката на кинеското Министерство за надворешни работи Мао Нинг на редовен брифинг со новинарите.
„Само примирје и прекин на непријателствата, кои се синоним за мир и стабилност во регионот на Заливот, фундаментално ќе ја зачуваат безбедноста и непречениот меѓународен поморски сообраќај“, рече таа. Таа го повтори ставот на Кина дека прекинот на огнот мора да се воспостави „веднаш“.
Кина и Иран се стратешки и трговски партнери. Кина остро ги осуди нападите на САД и Израел, но имплицитно ги критикуваше нападите на Иран врз земјите во регионот и блокадата на Ормутскиот теснец.
Сепак, од почетокот на војната, таа покажа воздржаност и избегнува масовна поддршка за Иран што може да им наштети на другите негови регионални интереси, вклучително и односите со земјите од Заливот. Пекинг ги интензивира дипломатските контакти и во четвртокот ја повтори својата подготвеност да одигра „конструктивна улога“ во повторното отворање на теснецот.
Неколку кинески бродови поминаа низ теснецот во последните денови благодарение на „координацијата со заинтересираните страни“, соопшти Пекинг оваа недела, не прецизирајќи кои се тие.