Премиерот на Белгија, Бард де Вевер, фламански националист, е застапник на идејата за обединување на Белгија и Холандија, со што би се создала четвртата најголема економија во Европската унија, со бруто домашен производ од 1,8 трилиони евра, објави телевизијата БФМ.
Де Вевер, кој ја презеде функцијата на 3 февруари, постојано се залагаше за „близок сојуз“ на земјите од Бенелукс, кој би можел да го вклучи и Луксембург и да биде „срцето на Европа“.
Додека беше поранешен лидер на опозицијата и градоначалник на Антверпен, тој велеше дека никогаш не се откажал од својот сон сите припадници на холандското говорно подрачје еден ден повторно да живеат заедно. Откако дојде на власт, продолжи да инсистира на ова, предизвикувајќи силни реакции, особено во Валонија, каде што се зборува француски.
Од француска перспектива, неговата идеја изгледа изненадувачка, но случајот не таков во Фландрија, каде што има развиено националистичко движење.
Една од насоките на ова движење се залага за повторно формирање на унијата на „Седумнаесетте покраини“, која некогаш вклучувала дел од северна Франција и Луксембург, според француската телевизија.
Овој сојуз бил распуштен во 1585 година кога Обединетите покраини, подоцна Холандија, добиле независност, само за накратко да бидат повторно воспоставени во 1815 година, пред повторно да се распаднат во 1830 година во Белгиската револуција.
Според „Брисел тајмс“, идејата за „Голема Холандија“ подоцна ја промовирале крајно десничарските партии во 1930-тите години, кои соработувале со нацистичка Германија за време на Втората светска војна.
Идејата за обединување на Белгија и Холандија би донела до формирање држава со речиси 30 милиони жители, четврта најмоќна во Европа, зад Германија, Франција и Италија, како и 12-та во светот.
Како што истакнал Де Вевер, спојувањето на пристаништата Антверпен и Ротердам ќе создаде „порта“ за економијата на северозападна Европа.
Фламанскиот премиер Матијас Дипенделе го поддржа предлогот на премиерот кон средината на ноември, истакнувајќи дека унијата на двете земји ќе создаде „алијанса за иновации“, особено во секторот за полупроводници.
„Ако погледнеме што се случува во светот и како САД сега гледаат на слободната трговија, како и каква е позицијата на Кина и заканата што доаѓа од Русија, јасно е дека треба да ги преиспитаме нашите сојузи“, нагласи тој.
Формирањето на таков сојуз, секако, би барало согласност од Холандија, која, како и Луксембург, во моментов ја следи оваа дебата од далеку, и како што заклучи фламанскиот премиер, создавањето на овој сојуз сигурно не би можело да се случи преку ноќ, заклучува француската телевизија.