Претседателката на Европската комисија Урсула фон дер Лајен остро реагираше на погребот на Ратко Младиќ, осуден за геноцид и воени злосторства. Таа оцени дека сцените од настанот во Белград се шокантни, а елементите на официјална поддршка и присуството на одредени високи српски функционери се длабоко за жалење.
„Сцените од вчерашниот погреб на Ратко Младиќ во Белград беа шокантни. Ратко Младиќ беше осуден воен злосторник. Тој беше одговорен за геноцид, воени злосторства и злосторства против човештвото. Почина додека отслужуваше доживотна казна затвор за геноцидот во Сребреница и други злосторства. Елементите на официјална поддршка и присуството на одредени високи српски функционери на погребот се длабоко за жалење. Тие покажуваат неуспех да се соочиме со темното поглавје од поновата европска историја и се во спротивност со вредностите врз кои почива патот на Србија кон Европската Унија. Нашите мисли се со сите жртви на злосторствата извршени во земјите од поранешна Југославија“, напиша фон дер Лајен на X.
За поранешниот командант на војската на Република Српска, кој почина во Хаг додека издржуваше доживотна казна, опело вчера служеше српскиот патријарх Порфирије со сослужение на епископи на СПЦ.
Меѓу присутните што му оддадоа почит беа српски министри, лидерот на владејачката коалиција во Република Српска Милорад Додик, Данило Вучиќ – син на претседателот на Србија, како и рускиот амбасадор Александар Боцан-Харченко.
The images from Ratko Mladić’s funeral yesterday in Belgrade were shocking.
Ratko Mladić was a convicted war criminal. He was responsible for genocide, war crimes, and crimes against humanity. He died while serving a life sentence for the Srebrenica genocide and other crimes.…
— Ursula von der Leyen (@vonderleyen) September 8, 2026