Палестинската исламистичка организација Хамас денеска соопшти дека нема да го положи оружјето додека не се воспостави независна палестинска држава.
Милитантната организација во соопштението наведе дека „вооружениот отпор не може да биде напуштен освен со целосно враќање на нашите национални права, од кои прво е воспоставување на независна, целосно суверена палестинска држава со Ерусалим како главен град“.
Индиректните преговори меѓу Хамас и Израел, со цел да се обезбеди 60-дневен прекин на огнот во Газа и договор за ослободување на заложниците, минатата недела беа во застој.
Седумнаесет земји, вклучувајќи ги Саудиска Арабија, Катар и Египет, го повикаа Хамас да го предаде оружјето на Палестинската управа, на конференција на ОН во вторникот, чија цел беше да се промовира решението со две држави.
„Њујоршката декларација“, подготвена од Франција и Саудиска Арабија, копретседатели на конференцијата, и поддржана од 15 други земји (вклучувајќи ги Бразил, Канада, Турција, Јордан, Катар, Египет и Велика Британија), како и од Европската Унија и Арапската лига, повикува на прекин на војната во Газа и постигнување „праведно, мирно и трајно решение на израелско-палестинскиот конфликт врз основа на имплементација на решение со две држави“.
Во тој контекст, овие земји нагласуваат дека „управувањето, спроведувањето на законот и безбедноста на целата палестинска територија мора да бидат исклучива одговорност на Палестинската управа, со соодветна поддршка“.
Овие изјави ги одразуваат обврските што палестинскиот претседател Махмуд Абас ги презеде во јуни во подготовка за оваа конференција и со цел да се убедат повеќе земји да ја признаат палестинската држава.