Милијардерот Илон Маск одлучи да ги стопира плановите за создавање на нова политичка партија, објаснувајќи им на блиските соработници дека негов приоритет се неговите бизниси, според извештај на „Волстрит џурнал“ објавен во вторникот, повикувајќи се на извори запознаени со ситуацијата.
Во јули, Маск ја промовираше идејата за Американската партија по жестоката јавна расправија со претседателот Доналд Трамп за даночните олеснувања и буџетските закони.
Според весникот, Маск неодамна се фокусирал на зајакнување на односите со потпретседателот Џ.Д. Венс и признал пред своите соработници дека лансирањето на партија може да ги наруши тие врски.
Најбогатиот човек во светот, заедно со своите соработници, им соопштил на луѓе блиски до Венс дека размислува да вложи дел од своите финансии за поддршка на Венс доколку тој се кандидира за претседател во 2028 година, пишува „Волстрит џурнал“.
Како извршен директор на „Тесла“ и „Спејс Екс“, Маск потрошил околу 300 милиони долари во 2024 година за поддршка на кампањата на Трамп и други републиканци, играјќи клучна улога во првите недели од мандатот на Трамп како раководител на новоформираниот Оддел за енергетска ефикасност (DOGE).
Венс, кој се заложи за смирување на тензиите по спорот меѓу Маск и Трамп, овој месец го повтори својот став и го повика Маск да се врати кон републиканците.
Акциите на „Тесла“ забележаа пад од над 18% оваа година по објавувањето во јули на најслабиот квартален резултат во продажбата во последната деценија, иако профитот ги надмина прогнозите на Волстрит, со маржа подобра од очекуваното.
Маск предупреди дека следуваат „предизвикувачки квартали“ откако администрацијата на Трамп ја укина поддршката за електричните возила. Инвеститорите се загрижени дали Маск ќе може да и посвети доволно внимание на „Тесла“ по неговите несогласувања со Трамп околу плановите за нова политичка партија.