Франција ќе забрани пушење во сите надворешни простории каде што често седат деца, објави министерката за здравство и семејство, Катрин Вотрен.
Забраната ќе стапи на сила на 1 јули и ќе се однесува на плажи, паркови, јавни градини, простории пред училишта, автобуски станици и спортски објекти. „Тутунот мора да исчезне таму каде што има деца“, рече Вотрен во интервју објавено во дневниот весник Ouest-France.
Вотрен додаде дека „слободата на пушење мора да заврши таму каде што започнува слободата на децата да дишат свеж воздух“. Таа нагласи дека терасите на кафулињата ќе бидат ослободени од забраната. Таа најави дека ќе се изрече казна од 135 евра за кршење на правилата, објави Би-Би-Си.
Таа вели дека полицијата редовно ќе проверува дали се почитуваат правилата. Иако електронските цигари се ослободени од забраната, Вотрен потврди дека работи на воведување ограничувања за количината на никотин што ја содржат.
Според Францускиот центар за следење на дроги и зависност од дрога, 23,1% од француското население пуши дневно, што е најнизок процент досега забележан.
Францускиот национален комитет против пушењето наведува дека повеќе од 75.000 пушачи умираат секоја година од болести поврзани со тутунот, што претставува 13% од сите смртни случаи.
Пушењето во установи како што се ресторани и ноќни клубови е забрането во Франција од 2008 година.