Соединетите Американски Држави вчера покренаа обвиненија за убиство против поранешниот кубански претседател Раул Кастро (94), што претставува голема ескалација во кампањата за притисок на Вашингтон врз комунистичката влада на островот.
Обвинението означува ново дно во односите меѓу долгогодишните соперници од Студената војна и доаѓа во време кога американскиот претседател Доналд Трамп се залага за промена на режимот на Куба, каде што комунистите на Кастро се на власт откако неговиот покоен брат Фидел Кастро ја предводеше револуцијата во 1959 година, јавува Ројтерс
Обвинението е поврзано со инцидент од 1996 година, кога кубанските борбени авиони МиГ соборија два цивилни авиони „Цесна“ што им припаѓаа на кубански дисиденти од Мајами, при што загинаа четири лица, од кои тројца беа американски државјани.
Во тоа време, Раул Кастро беше министер за одбрана на Куба и, според американските власти, тој ја дал наредбата за нападот. Нападот се случил над меѓународни води.
Обвинителството бара смртна казна за Раул Кастро, објави Министерството за правда на САД.
Раул Кастро, 94, е помладиот брат на Фидел Кастро. Откако Фидел сериозно се разболе, Раул ја презеде земјата – тој стана привремен лидер на Куба од 2006 година, официјално беше претседател на земјата од 2008 до 2018 година и лидер на Комунистичката партија на Куба од 2011 до 2021 година, кога официјално се пензионираше и му ја предаде власта на сегашниот претседател, Мигел Дијаз-Канел.
Мигел Дијаз-Канел денес изјави дека обвиненијата против Раул Кастро „немаат правна основа“ и нивната цел е да ја оправдаат неодговорната воена агресија против земјата.
САД ќе подигнат обвинение против кубанскиот лидер Раул Кастро