Американскиот претседател треба да ја добие Нобеловата награда за мир ако може да го убеди кинескиот лидер Си Џинпинг да се воздржи од употреба на сила против Тајван, изјави претседателот на островот Лаи Чинг-те, објави Ројтерс.
Се очекува Трамп да се сретне со Си на самитот на азиско-пацифичките лидери во Јужна Кореја подоцна овој месец.
Лаи се осврна на изјавата на Трамп од август дека Си му рекол дека Кина нема да го нападне Тајван додека е претседател.
„Се надеваме дека ќе продолжиме да ја добиваме поддршката од претседателот Трамп.
Ако претседателот Трамп може да го убеди Си Џинпинг целосно да се откаже од каква било воена агресија против Тајван, тој несомнено ќе биде добитник на Нобелова награда за мир“, рече Лаи.
Трамп рече дека ја заслужува честа, која им е доделена на четворица негови претходници во Белата куќа.
На прашањето што би му рекол на американскиот претседател доколку се сретне со него, Лаи рече дека би му советувал на Трамп да обрне внимание на постапките на Си.
„Би го советувал да обрне посебно внимание на фактот дека Си Џинпинг не само што спроведува сè поголеми воени вежби во Тајванскиот теснец, туку и ги проширува своите воени сили во Источнокинеското и Јужнокинеското Море“, забележа тој.
Соединетите Американски Држави, кои се законски обврзани да му обезбедат на Тајван средства за самоодбрана, долго време се придржуваат до политиката на „стратешка двосмисленост“, не прецизирајќи дали би одговориле воено на кинески напад врз Тајван.
Лаи ги отфрла територијалните претензии на Пекинг и вели дека само народот на островот може да одлучи за својата иднина. Кина, пак, го нарекува Лаи „сепаратист“ и постојано ги отфрла неговите предлози за преговори.