Украина во текот на ноќта изврши напади со дронови врз неколку енергетски капацитети во Русија, вклучувајќи ја нуклеарната електрана Курск и нафтениот терминал во пристаништето Уст Луга во Ленинградската област, потврдија руските власти.
Во нападот на нуклеарната централа Курск, близу границата со Украина, оштетен е помошен трансформатор, што предизвика намалување на оперативниот капацитет за половина, соопштија официјални лица.
Нема повредени во нападот, а избувнатиот пожар бил брзо локализиран и изгаснат. Според прес-службата на електраната, нивото на радијација во објектот и околината останува во рамките на дозволените граници.
Пожар избувна и во терминалот на нафтената компанија Новатек во пристаништето Уст Луга во Ленинградската област поради напад со украински дронови, изјави гувернерот на регионот Александар Дрозденко. Станува збор за голем комплекс на Балтичкото Море, кој се користи за преработка и извоз на нафта и нафтени производи на меѓународните пазари.