Украинскиот претседател Володимир Зеленски ги отфрли сугестиите дека безбедносните гаранции на САД би биле условени со откажување на Украина од Донбас.
Неколку западни медиуми објавија дека Вашингтон ги условува безбедносните гаранции со предавањето на источноукраинскиот регион Донбас на Русија, а ова го потврди и самиот Зеленски.
„Тие велат дека гаранциите ќе дојдат дури по завршувањето на војната – а војната ќе заврши кога ќе се повлечеме од Донбас. Ние не сме идиоти. Знаеме што значи тоа“, рече Зеленски во интервју за германскиот ZDF.
Тој додаде дека некои американски претставници, вклучувајќи ги Џаред Кушнер и Стив Виткоф, веруваат дека Русија ја добива војната, но нагласи дека таквата проценка е погрешна. Тој исто така нагласи дека Украина продолжува да води конструктивен дијалог со Вашингтон.
Зборувајќи за можните чекори кон смирување на конфликтот, Зеленски посочи дека Украина би можела да престане да ги таргетира руската енергетска инфраструктура ако Русија престане да напаѓа украински енергетски цели.
Тој, исто така, повтори дека Русија мора да плати за штетата предизвикана за време на војната, доброволно или преку економски механизми.