Украинскиот претседател Володимир Зеленски објави дека новиот премиер на Украина ќе биде првата вицепремиерка Јулија Свириденко.
Со ова официјално започна нова фаза од реконструкцијата на украинската влада.
Претходниот премиер Денис Шмихал ја предводи владата од март 2020 година, а неговиот мандат сега завршува во контекст на обемни структурни и одбранбени реформи.
– Предложив Јулија Свириденко да го преземе раководството на украинската влада и значително да ја обнови нејзината работа. Очекувам наскоро да презентирам нов акционен план – рече Зеленски во објава на платформата „X“.
Објавата доаѓа по неговата средба со Шмихал, на која беа договорени чекори за рационализација на државната администрација и пренасочување на максималните ресурси кон одбраната на земјата.
Зеленски на Фејсбук објави „значајна трансформација на системот за управување“ со цел намалување на трошоците на државната администрација, зајакнување на дерегулацијата и зголемување на ефикасноста.
– Така, ќе насочиме повеќе ресурси кон одбраната на Украина и заштитата на нејзините граѓани – нагласи тој.
Јулија Анатолиевна Свириденко е украинска политичарка и економистка, родена на 25 декември 1985 година во Чернигов. Од ноември 2021 година, таа е прв заменик-премиер и министер за економија на Украина.
Претходно, таа беше заменик-шеф на претседателската администрација, како и заменик-министер за економија.
Таа има диплома и магистратура по менаџмент и антимонополско управување од Киевскиот национален универзитет за трговија и економија, а студирала и во странство, вклучително и во Германија и во Шведска.
Својата кариера ја започнала како економист и проценител, а работела и на привлекување странски инвестиции.
Во еден период раководела со компанија за преработка на органска храна.
Добитничка е на бројни награди, вклучувајќи место меѓу 100-те највлијателни жени во Украина и на листата на „Тајм 100 Некст“. Свириденко е мажена е и има една ќерка.