Украинскиот претседател Володимир Зеленски јавно ѝ се обрати на нацијата за мировниот план на САД од 28 точки, оценувајќи го актуелниот миг како еден од најтешките во историјата на Украина.
„Сега доживуваме еден од најтешките моменти во нашата историја. Во моментов, Украина можеби ќе мора да направи исклучително тежок избор: или губење на достоинството, или ризик од губење на клучен партнер, или тежок план од 28 точки, или исклучително сурова зима, најсуровата, и дополнителни ризици што претстојат. Живот без слобода, достоинство и правда, и принудување да му веруваме на некој што веќе нè нападна двапати. Тие ќе чекаат наш одговор“, рече Зеленски во десетминутниот говор.
„Притисокот врз Украина во моментов е меѓу најсилните досега“, додаде тој.
„Конструктивна потрага по решенија ќе се спроведе со Соединетите Американски Држави. Ќе презентирам аргументи, ќе убедувам и ќе понудам алтернативи, но нема да му дадеме на непријателот никаква причина да каже дека Украина не е подготвена за мир. Секако, ние сме направени од челик, но дури и најсилниот метал на крајот може да попушти. Мораме да се собереме, да се вразумиме, да ги запреме меѓусебните конфликти и токсичните препирки. Државата мора да дејствува како единствен ентитет. Не смееме да изгубиме од вид кој е нашиот вистински непријател“, рече Зеленски.
Тој нагласи дека нема да ги предаде националните интереси на својата земја.
„Не ја предадовме Украина тогаш (во почетокот на војната во 2022 година – н.з.), нема да ја предадеме ни сега. Знам дека народот е со мене. Следната недела ќе биде тешка. Ќе има многу притисок – политички и информативен, со цел да се обиде да нè подели и дестабилизира“, рече Зеленски.