Рускиот министер за надворешни работи Сергеј Лавров денес изјави дека Москва очекува продолжување на разговорите со Украина, но нагласи дека „новите територијални реалности“ мора да бидат признати и дека треба да се воспостават нови системи за безбедносни гаранции.
За мирот да биде одржлив, новите територијални реалности мора да се признаат и формализираат во меѓународно-правна смисла, рече Лавров во интервју за индонезискиот весник Компас.
Во контекст на противењето на Русија на членството на Украина во НАТО, Лавров рече дека „на Украина треба да ѝ се гарантира неутрален, неврзан и ненуклеарен статус“.
Украина одговори дека Русија нема право да одредува кон што Киев може или не може да се приклучи, додека НАТО истакнува дека Русија не може да го блокира членството во алијансата, формирана во 1949 година за да се спротивстави на советската закана.
Лавров додаде дека раководителите на руската и украинската делегација се во директна комуникација и изрази очекување дека преговорите ќе продолжат.