Ормускиот теснец веќе не е најсмртоносниот воден појас оваа година. Според анализата на „Волстрит џурнал“, серија напади во Црното Море однеле повеќе животи отколку нападите врз бродови забележани досега во конфликтот меѓу Иран и САД, при што се нарушени трговските патишта и се зголемува притисокот врз НАТО.
Руските сили ги таргетираат трговските бродови што превезуваат извоз на храна од Украина преку Црното Море. Од друга страна, Украина користи беспилотни летала за напад врз руски пловила на спротивната страна од морето, наведува весникот.
Како одговор на тоа, бродарските компании во голема мера се повлекоа од водите во близина на Украина и Русија за да избегнат напади. Сепак, нападите се проширија и во водите кај Романија и Бугарија – две земји-членки на НАТО – што доведе до низа неодамнешни смртоносни инциденти.
Според податоците на компанијата за поморска безбедност „Амбри“ (Ambrey), оваа година во Црното Море се случиле повеќе од 300 напади. Во овие напади загинале над 30 морнари, додека повеќе од 20 други се водат како исчезнати, според извештаите на Турското здружение на сопственици на бродови, „Марин трафик“ (MarineTraffic) и локалните власти.
За споредба, податоците од Меѓународната поморска организација покажуваат дека од почетокот на конфликтот меѓу САД и Иран кон крајот на февруари, во Ормускиот теснец и поширокиот регион на Блискиот Исток се забележани околу 130 напади, во кои животот го загубиле 25 морнари.
Црното Море има огромно стратешко значење, служејќи како врска меѓу Европа и Азија. Шест земји – Бугарија, Грузија, Романија, Русија, Турција и Украина – граничат со ова море, овозможувајќи пристап до витални меѓународни трговски патишта.