Веста предизвика возбуда кај толпата собрана на Плоштадот на заложниците во Тел Авив. Возилата на Црвениот крст сега ќе се упатат кон деловите од Газа што се под израелска контрола, каде што заложниците ќе им бидат предадени на израелските сили.
Палестинската група Хамас претходно ги објави имињата на 20-те израелски заложници што ќе бидат ослободени, објави Ројтерс.
Лицата што ќе бидат ослободени се: Бар Абрахам Куперштајн, Евијатар Давид, Јосеф-Хаим Охана, Сегев Калфон, Авинатан Ор, Елкана Бохбот, Максим Херкин, Нимрод Коен, Матан Ангрест, Матан Зангаукер, Еитан Хорн, Еитан Абрахам Мор, Гали Берман, Зив Берман, Омри Миран, Алон Охел, Гај Гилбоа-Далал, Ром Браславски, Ариел Кунио и Давид Кунио.
Претходно овој месец, американскиот претседател Доналд Трамп изјави дека Хамас и Израел се согласиле за првата фаза од неговиот мировен план за Газа.
Палестинската група и Израел потпишаа договор за прекин на огнот. Владата во Тел Авив го одобри мировниот договор, а израелските сили почнаа да се повлекуваат од Газа.
Исто така, стана јасно дека Хамас нема да учествува во последователната администрација на Газа.