Кандидатот за градоначалник на Град Скопје од ВМРО-ДПМНЕ, Орце Ѓорѓиевски, денеска изјави дека потпишувањето на Декларацијата за заедничко делување претставува „историски чекор“ кон обединување за подобрување на Шуто Оризари и создавање достоинствено Скопје. Во објава на Фејсбук, Ѓорѓиевски истакна дека сите партии кои се приклучија кон коалицијата предводена од ВМРО-ДПМНЕ го поддржуваат Ерџан Демир, кандидатот за градоначалник на Шуто Оризари, кој, според него, ќе донесе промени што општината долго ги очекува.
„На Шуто Оризари му е доста од хаос, запоставеност и неправда. Доста е граѓаните од оваа општина да бидат третирани како граѓани од втор ред. Време е за промена. Време е за нова енергија, достоинство и развој, време е заедно да создадеме подобра иднина“, напиша Ѓорѓиевски.
Тој вети дека со поддршка од Град Скопје, Ерџан Демир ќе ја трансформира општината преку проекти како изградба на модерен стадион, Културен дом „Есма Реџепова“, обнова на улиците и комуналната инфраструктура, создавање зелени површини и уредени јавни простори, како и инвестиции во младите.
Ѓорѓиевски посочи дека Декларацијата за заедничко делување е потпишана од повеќе партии, вклучувајќи ги РОМ – Роми обединети од Македонија, Обединета партија за еманципација на Ромите, Демократска партија на Ромите, Сојуз на Ромите, Демократски сили на Ромите и Централна демократска унија.