Владејачката ВМРО-ДПМНЕ го прогласи првиот круг од локалните избори за апсолутна победа со освојување на триесет и три општини и обезбедување мнозинство во советите во поголемиот дел од општините низ земјата. Партијата влегува во вториот круг со значителна предност во дваесет и една од дваесет и седум општини каде што ќе се одлучува за градоначалници.
Предноста на Орце Ѓорѓиевски во Скопје со разлика од над 60 000 гласа е недостижна од противкандидатот на матната и непринципиелна коалиција која ги интересира, исклучиво, власт по секоја цена. Голема е предноста и на Дејан Митески во општина Аеродром, каде во однос на противкандидатот од СДС во првиот оствари разлика од околу девет илјади и петстотини гласа, како и на Сотир Лукровски во Карпош кој во втор круг влегува со позитива од околу илјада и петстотини гласа. Битката во втор круг продолжува и во општина Шуто Оризари, каде што влегуваме обединети со голема мобилизација за пресврт на резултатот и за победа на ВМРО-ДПМНЕ. За ВМРО-ДПМНЕ нема мала или голема општина, нема рурална или урбана општина, секоја општина е важна и ВМРО-ДПМНЕ се бори за секој еден граѓанин. Од друга страна, за функционални локални самоуправи кои ќе реализираат проекти и ќе ги решаваат проблемите на граѓаните, важни се општинските совети. И тоа е предусловот кој е исполнет во првиот круг од изборите, каде што во скопските општини ВМРО-ДПМНЕ има убедливо водство и мнозинство, соопшти ВМРО-ДПМНЕ.
Во општина Аеродром ВМРО-ДПМНЕ има мнозинство со петнаесет советници, бројот на освоени советници во Карпош е единаесет, во Шуто Оризари четири, а во Советот на Град Скопје освои осумнаесет советници. Ова се бројки на советници во советите на овие скопски општини кои ќе донесат одлуки за големи проекти, важни за граѓаните. Токму затоа, за да се заокружи оваа победничка слика која значи развој на општините, потребна е масовна поддршка од граѓаните за кандидатите за градоначалници од ВМРО-ДПМНЕ. Во недела на втор ноември, што е можно помасовно, да се излезе на гласачките места и со пенкало во рака, зад параваните, да заокружиме број девет за Орце, Сотир, Дејан и Ерџан и да ја испишеме историската победа на ВМРО-ДПМНЕ. Победа која ќе значи визија, напредок, развој и многу работа и проекти, соопшти ВМРО-ДПМНЕ.