Идните локални избори треба да се спроведат според нов Изборен законик. Министерството за правда ги вметнало препораките на ОБСЕ/ОДИХР кои за секој изборен циклус се повторуваат. Филков открива дека се испратени на мислење до регионалната безбедносна организација и се чека нејзиното мислење, пред да бидат поднесени во парламентот.
- „Се надевам, дека ќе го фатиме крајниот рок до јуни и ќе може да стигне до идните локални избори“, вели Филков.
Рокот е до јуни и декември, согласно со реформската агенда. Измените на Изборниот законик, министерот очекува да се најдат пред пратениците до 23-ти овој месец, а со тоа ќе се запазат и роковите за реформската агенда. Но, за зелено светло на измените, потребно е бадентерово мнозинство.
- „Се надевам дека сите политички партии се свесни дека не смеат да ги кочат законите кои се во интерес за граѓаните“, истакна Филков.
Во законските измени ќе се најде и прагот за потписи за независните кандидати. Консултациите се направени, препораките подготвени. Но, одлуката според Филков се чека од финалната верзија на Изборниот законик.
Спроведувањето на Реформската агенда од Планот за раст треба да резултира со придобивки за граѓаните и забрзување на интеграцијата на земјата во ЕУ. За пет од осум закони од првиот пакет закони од Реформската агенда со рок до јуни 2025 година Министерството за правда прави напори најдоцна до 23. месецов да влезат во собраниска процедура.
Министерот за правда Игор Филков, на почетокот на денешниот брифинг со медиуми за Реформската агенда, рече дека, иако од стапувањето на функцијата немале простор за прилагодување и соочување со низа проблеми, работеле и работат со максимални напори и дека најголемиот дел од законите се доставени и се во владина постапка.
- Министерството за правда, има помалку од 90 вработени, од 195 предвидени по систематизација. Ова е наследена состојба и сега правиме напори овие места да бидат повторно атрактивни – вели Филков.