Русија е подготвена да одговори на барањата на Венецуела за помош, но во исто време апелира да се избегне каква било ескалација на тензиите во регионот, изјави денес портпаролката на руското Министерство за надворешни работи, Марија Захарова.
Изјавата доаѓа откако венецуелскиот претседател Николас Мадуро апелираше до Москва за воена поддршка. Неговото барање вклучува поправки на борбените авиони „Сухој“ од руско производство, надградба на радарските системи и испорака на ракетни системи.
Каракас го оправдува потегот како одговор на растечките закани од Вашингтон, за кој вели дека значително го зголемил своето воено присуство во Карибите во последните месеци.
Американската војска го зголеми своето присуство во Карипското Море и во близина на Венецуела во последните месеци. Администрацијата на американскиот претседател Доналд Трамп го нарекува тоа дел од борбата против нарко-картелите, но Каракас го гледа потегот како директна закана.
Пентагон распореди разорувачи, подморници и борбени авиони Ф-35 во областа околу Порторико и јужните Кариби, што го прави регионот една од клучните точки на тензии меѓу Вашингтон и сојузниците на Русија.
Во исто време, Венецуела сè поотворено ги зајакнува своите односи со Москва.
Во последните недели беа потпишани нови договори за воена и енергетска соработка, а руските претставници редовно ја нагласуваат својата подготвеност да „го поддржат пријателскиот народ на Венецуела“.
Ваквите случувања дополнително ги зголемуваат тензиите во регионот, во време кога Каракас сè повеќе се повикува на „агресивна политика на САД“ и бара поголема поддршка од своите сојузници, првенствено од Русија.