Реактивирање на штрајкот во М-НАВ најавија од Синдикатот на контролори на летање доколку не се усвојат нивните барања за поништување на последниот оглас за вработување на советници и кадри со завршено средно образование, како и барањата за реализација на сите неисполнети точки од минатогодишната Спогодба која беше основа за ставање во мирување на тогашниот штрајк.
По најавата, стаса и категоричен одговор на македонскиот премиер, Христијан Мицкоски, дека „не се плаши од закани“ ги следат проблемите што се појавуваат повторно во државната компанија М-НАВ. До ова доаѓа откако реагираше Струковиот синдикат на контролорите на летање на неколку огласи за примање советници и техничари со средно образование наместо стручни кадри. Контролорите, кои го најавуваат штрајкот за 10 јули, реагираат за серија огласи за, според нив, непотребни вработувања, но и за нарушените односи во државната компанија М-НАВ, за што со писмено обраќање го предупредуваат Управниот одбор.
– Состојбата во М-НАВ е влошена како резултат на сериозно нарушените меѓучовечки односи, блокираните процеси за јавни набавки, неуспешната транзиција на нови технички системи, прекршувањето одредби од Колективниот договор, тајните и неосновани измени во систематизацијата, отворањето несуштински работни позиции и прераспоредувањето без почитување на актите на друштвото до раководството, како и непочитувањето точки од спогодбата помеѓу М-НАВ и ССКЛ од 13.7.2023, која беше основа за ставање на штрајкот во мирување – се наведува во обраќањето.
Нивната реакција деновиве ја предизвикаа неколку огласи со кои, на пример, се бараа: оператор со четврти степен средно образование со плата од 66.269 денари во националниот Центар за трансмисија на податоците, авторизација и надзор на летовите; двајца гимназијалци без работно искуство со плата од 51.325 денари во Одделението за воздухопловни информации; техничар за климатизација и техничко одржување со личен доход од 50.179 денари; двајца помошници за развој, инвестиции и набавки.
Премиерот Христијан Мицкоски пак, за најавите на Синдикатот за реактивирање на штрајкот во М-НАВ вели дека вработените кои се закануваат со штрајк се истите кои направиле упад во институцијата.
Огласите биле распишани иако претходно Министерството за финансии дало согласност за прием на метеоролози и на инженери, кои се неопходни поради заминувањето на овој кадар во пензија. Синдикатот смета дека е ова продолжување на партиските вработувања што се непотребни, како што правеше претходното раководство на М-НАВ.
– Како се претворија тие инженери и метеоролози во советници и среднисти не ни е јасно и одговор треба да аде Управниот одбор со тројцата директори. Тие вработувања не одговараат на реалните итни и суштински потреби на компанијата. Огласите треба да се поништат, а евентуалното пополнување на работните позиции да се изврши преку прераспоредување на постојни вработени во М-НАВ, преку интерен оглас или со додавање работни задачи на недоволно ангажираните вработени, како и одделенски реорганизации и рационално прераспоредување на постојниот кадар – потенцираат од Синдикатот.
За премиерот Христијан Мицкоски, причина за најавите за штрајк не е распишаниот оглас за вработување кадри.
– Не мислам дека е тоа причината, се закануваат оние што правеа упад и тепаа. Е сега немаат внимание и не се толку силни да тепаат, и тоа е. А ние од закани не се плашиме – рече Мицкоски.
Во јануари минатата година, еден вработен во М-НАВ, со уште неколкумина непознати, физички нападна тројца вработени во Контролата на летање на Скопскиот аеродром. Напаѓачите тогаш беа поврзани со партијата ДУИ.