Стружанецот Ердал Лушо го започна своето епско патување – сам со едрилица од Портимао, Португалија, кон Карибите. По четири години подготовки и долго чекање на поволни услови, тој заплови во саботата, а на социјалните мрежи може да се следи неговата моментална позиција на картата.
На својот Инстаграм профил објави видео од последните часови пред стартот: „После 4 години спремање, ни останаа 16 часа до старт. Гужва е пред едрилиците, сите се спремаат, возбудени, некои се и загрижени ама ќе биде добро“.
Иако Португалија во саботата ја зафати силната бура Клаудија, во која загинаа три лица, таа главно го погоди северот и центарот на земјата, па најјужниот дел од каде тргна Лушо остана релативно поштеден.
Пред три дена за МИА тој ги сподели своите очекувања: „Идејата се појави уште во раните денови од мојата кариера. Како што стекнував искуство во едрење и бродоградба, таа идеја постепено се претвори во проект. Денес, конечно го живеам она што некогаш ми беше само сон.“
На прашањето дали се плаши од океанот, Лушо одговори: „Не би рекол дека ми е страв. Мислам дека ниту една природна сила не е злобна и нема намера да ти наштети – тоа е едноставно природата. Кон неа имам огромна почит и постојано се адаптирам.“
Меѓу најголемите опасности ги издвои нападите на орки во првиот дел од патеката и грмотевиците, додека за спиењето рече дека е една од најтешките работи – обично 3,5 до 4 часа дневно, во интервали од 20 до 40 минути.
„Колку помалку спиеш, толку побрзо се движиш. Едрилицата никога не запира. Досега само 14 луѓе ја завршиле регатата според строгите правила, а со 5-метарска едрилица самостојно Атлантикот го препловиле само 49 лица во историјата.“