Под паролата „Правда за Фатон Љури. НЕ селективно судење“ и со извиците „Нема правда, нема мир“, група граѓани денеска протестираа пред Киривичниот суд во Скопје против 11-годишната затворска казна за мотоциклистот што го прегази скопјанецот Југослав Николовски на пешачката патека зад Владата.
Протестот почна пред паркот во Чаир, а заврши пред Судот, кадешто демонстрантите го искажаа своето незадоволство од пресудата за Љури, кој управувајќи мотоцикл без возачка дозвола летоска го усмрти 68-годишниот Николовски.
Судијката во пресудата напиша дека, иако за ова дело затворските казни се пониски, зачестиле сообраќајките со жртви, па пресудата за Љури испратила порака дека таквиот начин на управување моторни возила е недозволен.
„Зошто да се казнува 24-годишпно младо момче, кога не сакајќи се случило. Утредента може да ни се случи на сите. Па, имало пример и порано вакви случаи, кога била досудена минимална казна, како во случајот на Бобан Илиќ, што го има убиено детето четиригодишно (Алмир од Куманово – н.с.). До кога ќе биде оваа неправда кон нас во оваа држава?“, праша Фатмир Јашари, еден од тие што протестираа пред Судот.