Можни ли се поевтини пакет-услуги за Македонците, по најавите дека офивијално во земјава влегува трет мобилен оператор. Премиерот Христијан Мицкоски, кој престојува на Светскиот економски форум во Давос, Швајцарија, соопшти дека компанијата „Фор-ај-џи“ (4iG), која ја доби лиценцата за третиот мобилен оператор во Македонија, планира да инвестира повеќе од 100 милиони евра во развојот на своите услуги во земјата. Мицкоски истакна дека ова вложување ќе донесе нов конкурент на пазарот на мобилни услуги, што, според него, треба да има позитивно влијание врз намалување на цените што ги плаќаат корисниците.
- „Граѓаните добиваат нова компанија која ќе нуди мобилни услуги и која, уверен сум, ќе влијае позитивно во намалување на трошоците за корисниците“, истакна премиерот од форумот.
Средбата со сопственикот на 4iG беше една од низата активности на Мицкоски во рамките на форумот, каде што тој учествува на панел дискусии со светски лидери и претставници на мултинационални компании за глобалните предизвици и можности за развој.
Мицкоски додаде дека Македонија како земја мора активно да се вклучи во глобалните инвестициони текови и да ја искористи можноста за привлекување капитал и технологија, особено во сектори што носат додадена вредност за граѓаните.