Празниците, особено Велигден, за министерот Панче Тошковски не се само традиција, туку потсетник на суштинските вредности: верата, заедништвото и одговорноста што ја носи не само како функционер, туку и како сопруг и татко. Во неговите зборови се чувствува јасна свесност дека времето со семејството е непроценливо, но и непоколеблива посветеност кон работата што ја доживува како чест и обврска.
Велигден во неговото детство бил исполнет со возбуда, семејна топлина и подготовки што започнувале уште од Велики петок. Мирисот на бојадисани јајца и заедничките моменти во домот го претворале празникот во вистинско чувство на заедништво. Посебно место имаат и велигденските собири во Велес по полноќната литургија, кога се создавале сцени на заедништво меѓу семејства, соседи и пријатели. Токму тие едноставни, но силни моменти ја обликувале неговата љубов кон традицијата и вредностите што денес се труди да ги пренесе и на своите деца.
ЖМ:Јавната функција, особено кога се работи за Министерството за внатрешни работи, бара постојана готовност и присуство кога е потребно, дури и за време на празници. Како ви успева да го одржите балансот меѓу службените обврски и семејните моменти, особено во празничните денови?
– Времето поминато со семејството нема цена, тоа е јасно. Но да се работи за Македонија е чест и гордост, особено кога сте на позиција од која може навистина да направите нешто конкретно, за луѓето, за државата, а на крајот и за сопствените деца и нивната иднина. Да се направи баланс не е лесно, но кога знаете зошто го правите тоа, полесно се справувате.
ЖМ: За оние што покрај јавната функција ја имаат и улогата на родител, празникот добива уште подлабоко значење. Што за Вас значи Велигден како човек, а што како сопруг и татко на три деца?
– Празниците се времето кога семеен човек го наоѓа спокојот и мирот со своите најблиски. Велигден е еден од најубавите христијански празници бидејќи го одбележува воскресението Христово, а тоа е симбол кој длабоко ме допира. Како татко на три деца, искрено ми е жал кога не сум со нив на ваков ден. Но горд сум кога знам дека отсуствувам поради нешто важно за државата и за нашите граѓани. Тоа е нешто што со сопругата го разбираме меѓусебно, иако не е секогаш лесно.
ЖМ: Раѓањето на дете секогаш носи нова перспектива, го менува погледот кон светот, но и кон сопствената внатрешност. Дали новиот член на семејството, Вашиот син го направи овој Велигден поразличен, подлабок?
– Секое дете кое доаѓа во семејството е нешто посебно и тоа не се менува без разлика дали е прво или трето. Кога имате мало дете дома, некако поинаку гледате и на секојдневните работи и на празниците. Почесто размислувате за тоа каква средина и каква иднина му оставате. Можеби тоа е она суштинското, дека децата не ве менуваат драстично, туку едноставно ве потсетуваат постојано зошто го правите она што секојдневно го правите.
Интервјуто со министерот Тошковски продолжува на Женски магазин.