Министерот за образование на Сингапур потврди дека наставниците ќе можат да користат ќотек како дисциплинска мерка за проблематични ученици во одредени случаи.
„Во нашите училишта се користи физичко дисциплинирање кога другите мерки не се доволни, со оглед на сериозноста на прекршокот“, изјави Дезмонд Ли пред парламентот во вторникот, одговарајќи на прашања за новите мерки против врсничко насилство воведени на 15 април. Едно од прашањата се однесуваше и на влијанието на физичкото казнување врз децата, вклучително и учениците на возраст од девет години, како и врз нивното ментално здравје.
„Има строги протоколи за да се обезбеди безбедноста на учениците. На пример, физичкото казнување мора да биде одобрено од директорот и може да го спроведуваат само овластени наставници“, изјави Ли пред пратениците. Новата рамка треба да стапи во сила во сингапурските училишта од 2027 година, објави CNN.
Тој додаде дека училиштата ќе ја земат предвид зрелоста на учениците и ќе проценат дали таквата казна може да му помогне на детето да ја разбере сериозноста на своето однесување и да научи од своите грешки.
„Училиштата одлучуваат дали да ја користат оваа дисциплинска мерка откако ќе ги проценат околностите на прекршокот“, рече Ли.
Дали таков пристап може да помогне во намалувањето на врсничкото насилство?
Тој истакна дека пристапот се базира на истражувања кои покажуваат дека децата и младите луѓе донесуваат подобри одлуки кога постојат јасни граници и специфични последици за несоодветно однесување. Според него, таквиот пристап може да придонесе и за намалување на малтретирањето.
Упатствата објавени на веб-страницата на Министерството за образование јасно наведуваат дека физичкото казнување може да се применува само врз момчиња.
„Тепањето е дисциплинска опција исклучиво за момчиња и треба да се користи само за сериозни прекршоци, како последно средство кога е апсолутно неопходно“, се вели во упатствата.
Телесното казнување во училиштата станува сè поретко во многу делови од светот во последните децении.
Сепак, Светската здравствена организација (СЗО) проценува дека помеѓу една четвртина и половина од децата ширум светот доживуваат физичко казнување во училиштата и повикува на целосно укинување на оваа практика.
„Последиците од физичкото казнување на децата можат да траат цел живот и негативно да влијаат врз физичкото и менталното здравје, образованието и социјалното и професионалното функционирање“, предупреди СЗО во извештај објавен во август 2025 година.
„Има силни научни докази дека физичкото казнување на децата носи повеќекратни ризици и нема придобивки за децата, родителите или општеството“, се додава во извештајот.
Сингапур, мал, но високо развиен и богат финансиски центар во Југоисточна Азија, е познат по своите строги закони.
Кон крајот на април, еден француски тинејџер беше обвинет за две прекршоци што би можеле да го доведат во затвор до две години откако наводно ја излижал сламката од машината за сок од портокал, а потоа ја вратил во садот.
Ова не е првпат странските тинејџери да имаат проблеми со строгите закони на Сингапур.
Еден од најпознатите случаи се случи во 1993 година, кога Американецот Мајкл Феј беше уапсен за поседување украдена стока и вандализирање автомобили со спреј.
Феј, тогаш 18-годишен, беше осуден на четири месеци затвор и шест удари со стап. Казната подоцна беше намалена на четири удари по меѓународната критика и интервенцијата на тогашниот американски претседател Бил Клинтон.
Сингапур ја изврши казната и покрај силниот притисок од Вашингтон, кој рече дека е важно да се почитуваат неговите закони, дури и кога станува збор за странци. Случајот накратко ги затегна односите меѓу САД и Сингапур.