Тринаесетгодишно дете денеска околу 12:40 часот било пренесено во Градската општа болница „8-ми Септември“ откако во стан во центарот на Скопје избувнал пожар.
Според првичните информации, детето било само во станот и се обидувало да готви кога се запалиле кујнска крпа или сунѓер. Во обид само да го изгаси огнот, малолетникот ги изнел запалените предмети на терасата, при што се запалиле и алишта кои се сушеле.
Детето се здобило со изгореници и вдишало чад. Благодарение на брзата реакција, успеало навреме да излезе од станот пред пожарот да се прошири.
На местото интервенирале екипи на противпожарната служба и Итната медицинска помош. Детето е пренесено во болница за понатамошен третман.
Од Министерството за внатрешни работи соопштија дека се преземаат мерки за целосно расчистување на случајот.