Николовски – Залаи Бобровницки: Потврдени одличните пријателските односи меѓу Македонија и Унгарија

Вицепремиерот и министер за транспорт Александар Николоски, кој е во работна посета на Унгарија, денеска остварил средба со министерот за одбрана, Кристов Залаи Бобровницки. Како што соопштија од Министерството за транспорт, на средбата на која се разговарало за партнерството меѓу двете земји, била истакната одличната соработка во делот на одбраната, како важен дел во остварување на целите на НАТО алијансата.

– Стратешката цел е зачувување на мирот и стабилноста во регионот, истакнал вицепремиерот Николоски, додавајќи дека Македонија е рамноправен партнер во НАТО сојузот и во своите капацитети дава сериозен придонес во зачувување на глобалниот мир и безбедност. Исто така тој потенцирал дека Македонија со своите политики дава огромен инпут во регионалниот развој и станува земја пример за регионална соработка со што покажува огромен капацитет за постигнување на европските вредности. На средбата се дискутирало и за нови можности за соработка меѓу двете земји во делот на одбранбениот сектор, истакнувајќи го фактот дека Македонија нуди сериозен инвестициски потенцијал. – Пријателските односи меѓу Македонија и Унгарија се на одлично ниво, тоа се потврдува на овие средби и периодот што следи ќе се посвети на интензивирање на соработката која ќе овозможи зацврстување на односите во области од заеднички интерес за двете земји, потврдиле двајцата соговорници, се наведува во соопштението.