Натаму порталот истакнува: Плочата долги години беше надвор од вниманието на јавноста, зашто преминот кон Грција не функционираше од 1967 и таму немаше проток на патници. При реконструкцијата на граничниот премин, што се прави од македонска страна, плочата е зачувана. Таа се наоѓа во близина на новата инфраструктура што е подигната на преминот.
Гранитот од годините и атмосферските влијанија е потемнет, но на него јасно може да се прочита испишаниот текст: „На седумте младинци борци од Лерин, ѕверски убиени на 17 јануари 1944 година од бугарскиот фашистички окупатор“. Плочата сведочи за заедничките страдања што ги имаше народот од двете страни на границата во Втората светска војна.
„На 17 јануари 1944 година, бугарски војници го опколија и влегоа во селото Герман (денес Агиос Германос, Грција) и ги блокираа куќите. На патот од Герман за Роби (денес Лемос), окупаторите пресретнаа и заробија седум младинци од Лерин на возраст од 17 до 20 години кои сакаа да им се придружат на партизаните. Ги врзаа со бодликав те така што од рацете непрестано им течеше крв. Мајорот кој ги спроведуваше младинците, со кундакот од пушката маваше по нив. На патот кон селото Герман, едно од заробените момчиња изгуби рамнотежа и падна, па над него се навалија и другите, зашто беа врзани заедно. Тепањето и малтретирањето тогаш продолжи со уште поголема жестокост. Од селото Герман беа спроведени до Маркова Нога. Тука на свиреп начин биле убиени. Овој морничав случај го потресе населението од цела Преспа.“ – вели историчарот Александар Литовски.
Општинското собрание на Ресен во социјалистичкиот период, во чест на загинатите момчиња на местото каде што беа убиени во непосредна близина на грчката граница подигна спомен-плоча и засади седум борови. Во иднина плочата ќе треба да се реставрира и да ѝ се најде соодветно место на Маркова Нога. Дрвца крај преминот беа посадени и во март 2025, кога беше поставен камен-темелникот со кој се означи почетокот на реконструкцијата на граничниот премин Маркова Нога, на македонската страна од границата.