Култниот хотел „Бристол“ во центарот на Скопје е продаден, а според податоците на Агенцијата за катастар на недвижности, нов сопственик е ГМ „Проперти“.
Според „Company Wall“ мрежата, оваа фирма основана е пред две години и немала приходи ниту пак вработени. Податоците покажуваат дека е под финансиска изложеност со подигнато банкарско кредитирање од над 300 милиони денари или околу 5 милиони евра, објави Фокус
Сопственик на ГМ Проперти во моментов е Емил Кратовалиев, член на Управниот одбор на осигурителната компанија Уника . Основач заедно со Кратовалиев бил и Зоран Антиќ, сопственикот на МГ Фешн и акционер на „Македонијатурист“ во чија сопственост е хотелот Бристол, но тој излегол од сопствеништвото во текот на март 2026 година.
Во мај годинава „Македонијатурист“ преку Македонска берза објави дека Собранието на акционери ја одобрило продажбата на хотелите. Покрај овие објекти, ќе се продаваат и становите што ги поседува ова акционерско друштво на улица Максим Горки и деловниот простор „Пивница“.
Кастрофалниот земјотрес во 1963 година затрупа 80% од градителското наследство во Скопје, а оние згради кои преживеаја никогаш не станаа приоритет на заштита.
Хотелот „Бристол“ во 2023 година требаше да прослави 100 години од своето постоење, но е затворен со години. Се наоѓа во близина на старата Железничката станица и е крстен според истоимениот ланец хотели. Браќата Атанас и Ристо Караџа, кои биле ценети скопски трговци и угледни граѓани, го изградиле хотелот „Бристол” во 1923 година. Во собите вовеле и телефонски приклучоци, а имале гаража со капацитет за неколку автомобили.