Наградата им оддава признание на млади лица на возраст од 13 до 20 години кои, и покрај ограничените ресурси, дејствувале во духот на Раул Валенберг, покажувајќи исклучителна храброст и извонредна иницијатива. Годинава наградата достигна до повеќе земји од кога било досега. Во образложението за доделувањето на наградата се нагласува: „Јован Костадинов го изложил на опасност својот живот, за да спаси луѓе заробени во смртоносен пожар во ноќен клуб. Неговата храброст и несебичност спасиле повеќе човечки животи.“
„Во време кога улогата на младите во обликувањето на општеството премногу често се потценува, поважно од кога било е да ги препознаеме оние кои создаваат позитивни промени во своите заедници и пошироко преку храброст, морални убедувања и конкретна акција. Овогодишните добитници покажуваат како младите можат да ги претворат вредностите во дела и вистински да придонесат за подобар живот на другите, во духот на Раул Валенберг“, изјави Ана Уромби, генерална секретарка на Академијата „Раул Валенберг“.
Добитниците беа избрани од номинации поднесени од граѓани, училишта и амбасади од 15 земји: Австралија, Канада, Грција, Унгарија, Монако, Црна Гора, Нов Зеланд, Македонија, Норвешка, Полска, Србија, Шведска, Танзанија, Уганда и САД. „Фактот што наградата денес достигнува до повеќе земји од кога било претставува јасен доказ дека посветеноста на младите кон човековите права и демократските вредности е глобална сила. Со својата ангажираност, добитниците на наградата ‘Младинска храброст’ покажуваат дека тие не се само иднината, туку веќе денес се клучни двигатели на позитивните промени“, изјави Мадлен Шестед, генерален директор на Шведскиот институт.
Сите добитници се поканети во Стокхолм каде што ќе ги примат своите признанија на официјалната церемонија за доделување на наградата „Младинска храброст“, која ќе се одржи на Денот на Раул Валенберг, во четврток, 27 август, од 16:00 до 17:15 часот. За време на церемонијата ќе биде доделена и Наградата „Раул Валенберг“. За време на престојот во Шведска, од 25 до 28 август, добитниците ќе учествуваат и во едукативната програма „По стапките на Раул“ (In Raoul’s Footsteps) во Стокхолм. Програмата опфаќа низа активности, меѓу кои и средба со министерката за надворешни работи на Шведска Марија Малмер Стенергард.