„Пожарот кај Горно Чичево и Долно Чичево е најверојатно е започнат од стрниште. Поради високата и сува трева и ветерот се раширил со голема брзина, загрозувајќи ги двете села. Ми се јави итно градоначалникот на општина Градско, бараше итна помош.“ – напомна Ангелов во видео-изјава.
Првиот човек на ДЗС наведе дека тука итно биле испратени противпожарни екипи од Велес, Неготино и Кавадарци, но не биле доволни да се сопре огнената стихија којашто се движела со голема брзина, поради што ги пренасочил воздушните трактори коишто од рано утрово дејствувале на големиот пожар на планината Китка.
„Ги пренасочив овде, помогнаа за почетно фаќање контрола врз овој пожар, а веднаш потоа продолжи со дејство и полицискиот хеликоптер. Голема благодарност и до локалното население коешто со трактори излезе да заора, да направи противпожарни пресеки и со тоа да го пресече овој пожар. Се надевам дека набргу истиот ќе биде целосно изгаснат “, истакна Ангелов во видео изјава.