Просечната месечна нето-плата по вработен во јули изнесувала 48.499 денари, покажуваат податоците на Државниот завод за статистика. Во споредба со јули лани, номиналниот раст е 7,1 отсто, а реалниот – откако ќе се одземе инфлацијата од 2,4 процентни поени – изнесува 4,7 отсто.
На месечна основа, во однос на јуни кога просекот бил 48.381 денар, зголемувањето е минимално – 0,2 отсто номинално, односно 0,1 отсто реално.
Највисок просек и натаму се бележи во секторот Информации и комуникации – 89.532 денари. Најниски плати има во угостителството и хотелиерството, со просек од 34.693 денари. Во преработувачката индустрија просекот е 43.276 денари, во трговијата 45.230, а во градежништвото 56.637 денари.
Најсилен годишен раст е забележан кај финансиските дејности и осигурувањето (10,7 %), снабдувањето со вода и управувањето со отпад (10,4 %) и дејностите поврзани со недвижен имот (9,6 %).
На месечно ниво најмногу пораснале платите во стручните, научните и техничките дејности (4,3 %), трговијата (3,2 %) и градежништвото (2,3 %).