Премиерот Христијан Мицкоски најави дека уште денеска ќе побара од министерот за култура и туризам разрешување на директорот и на целиот Управен одбор на институцијата што управува со споменикот „Македониум“ во Крушево. Причина за оваа одлука е скандалот што предизвика силни реакции во јавноста, откако просторот на овој важен споменичен комплекс бил даден под наем за снимање музички спот на рапер од Косово.
„Навистина тоа коешто таму се случило е нешто коешто не требало да се случи. Ќе побарам од министерот за култура и туризам да биде разрешен директорот на таа институција, заедно со Управниот одбор, бидејќи таков тип на институции не треба да бидат изнајмувани и користени за такви намени“, истакна Мицкоски.
Тој им се извини на граѓаните поради направениот пропуст и нагласи дека ќе бидат преземени сите неопходни мерки за да се спречи повторување на слични инциденти во иднина.