Последниве години се забележува континуиран тренд на намалување на бројот на невработени, особено ако се земат предвид бројките на Агенцијата за вработување. Од месец во месец, Агенцијата регистрираше се помалку лицата кои се пријавуваат за невработени. Според последните бројки, во јули бројот на невработени изнесувал 88.209, додека пак во категоријата други лица кои бараат работа се пријавиле 41.072 граѓани, објави Фактор. Бројките кои ги објавува Агенцијата покажуваат дека годинава темпото на намалување на невработеноста забрзало во првите месеци од годината, но потоа се случил пресврт и имало нов раст на лицата кои се пријавуваат како невработени.
Па так, два месеци претходно, односно во мај бројот на невработени изнесувал 86.116 лица, додека во категоријата други лица кои бараат работа имало пријавено 41.332лица. Во мај имало најмалку пријавени невработени лица во Агеницијата. Веќе следниот месец, или во јуни нивниот број се зголемил на 88.541 невработени.
- Од друга страна во април имало 87.621невработени граѓани. Се до мај бројот на невработени континуирано се намалувал. За споредба на почетокот на годината, или во јануари како невработени се пријавиле 90.214 граѓани.
Најголем дел од невработените граѓани се во главниот град. Имено, во Скопје како невработени се пријавени 20.785граѓани. Со високи бројки на невработени граѓани се бори и Тетово каде имало 11.319 невработени граѓани. По бројот на невработени граѓани следен на листата е Куманово каде се пријавиле точно 8.802 невработени лица. Следен град со повисока невработеност е Гостивар, каде бројката достигнува 6.235 лица, а потоа е Прилеп каде што како невработени се пријавиле 5.308 граѓани.
Податоците на АВРМ покажуваат оти најголем дел од невработените се на возраст од 55 до 59 години. Побројна група на невработени се и граѓаните на возраст од 50 до 54 години. Она што зачудува во податоците на Агенцијата е фактот дека во секое пребројување меѓу невработените се јавуваат и доктори на науки – 27 лица, како и магистри – 664 невработени. Ова покажува дека не е доволно само да се стекне високо образование, туку и во која област се надградуваат граѓаните.
Сепак, најголем група на невработени се лицата без образование, или само со основно образование. Тие достигнуваат дури до 50.426 од вкупниот број на пријавени граѓани кои се невработени.