Скопје и Македонија, од вторник 28 октомври, ќе бидат во центарот на светската енергетска сцена. Во периодот од 28 до 30 октомври 2025 година, во Скопје ќе се одржи 14-тиот Меѓународен форум за енергија за одржлив развој (IFESD-14), под наслов „Од цели кон акција: Напојувајќи ја иднината со одржлива енергија / From Goals to Action: Powering the Future with Sustainable Energy“.
Огромен интерес – Над 1000 пријавени учесници од повеќе од 70 земји – меѓу кои високи претставници на меѓународни институции, економски лидери, академици и експерти – ќе се соберат во главниот град на Република Северна Македонија за да ја обликуваат иднината на енергетиката и одржливиот развој.
Настанот го организира Министерството за енергетика, рударство и минерални суровини на Република Северна Македонија, во соработка со Програмата за развој на Обединетите нации (УНДП) и петте регионални комисии на Обединетите нации (UNECE, UNESCAP, UNECLAC, UNECA и UNESCWA).
На свеченото отворање ќе се обратат:
- Премиерот на Република Северна Македонија, Христијан Мицкоски
- Сања Божиновска, министерка за енергетика, рударство и минерални суровини
- Армен Григорјан, постојан претставник на Обединетите нации во Северна Македонија,
- Татијана Молчан, извршна секретарка на Економската комисија на Обединетите нации за Европа (UNECE),
како и високи претставници на владите, меѓународните организации и енергетскиот бизнис-сектор.
Во текот на тридневниот форум ќе се одржат низа панел-дискусии, технички сесии и тематски разговори на кои ќе се разгледуваат најактуелните прашања поврзани со енергетската безбедност и отпорност, финансирањето на чиста енергија, дигитализацијата на системите, управувањето со критични суровини, праведната транзиција, како и улогата на младите и жените во енергетската трансформација.
