Извозот на стоки од Македонија од јануари до јули годинава забележал поголем раст во однос на увозот во истиот период, покажуваат најновите податоци на Државниот завод за статистика.
Вкупната вредност на извезените стоки во првите седум месеци од 2026 година изнесува 314.660,2 милиони денари и бележи раст од 8,45 проценти во однос на истиот период од претходната година. Вредноста на увезената стока, пак, изнесува 443.910,2 милиони денари, што е за 7,93 отсто повеќе во споредба со периодот јануари-јули 2025 година.
Трговската размена по производи според Стандардната меѓународна трговска класификација покажува дека во извозот најголемо е учеството на: катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, деловите на седишта од подгрупата 821.1 и други катализатори на носачи.
Во увозот најмногу се застапени: платината и легурите на платина, необработени или во прав, другите метали од платинската група и нивни легури, необработени или во облик на прав, нафтените масла и маслата добиени од битуменозни минерали (освен сурови) и други моторни возила за превоз на лица.
Во периодот јануари-јули 2026 година, според вкупниот обем на надворешнотрговската размена, најмногу се тргувало со Германија, Велика Британија, Кина, Грција и Србија, кои учествуваат со 49,4 проценти во вкупниот обем на размената. Земјите-членки на Европската Унија учествуваат со 58,7 отсто во вкупната размена.