Во зградата на Бугарската трговско-индустриска комора (БТПП) денеска беше официјално отворена Бугарско-македонската трговско-индустриска комора (БМТИК), со што е заокружен процесот на воспоставување билатерални стопански комори меѓу двете соседни земји.
На церемонијата присуствуваа заменик-министерот за економија и индустрија на Бугарија, Антон Костадинов, амбасадорката на Република Северна Македонија во Бугарија, Агнеса Руси-Поповска, градоначалници и заменик-градоначалници од Југозападна Бугарија, претседателката на Македонско-бугарската стопанска комора, Билјана Митева, и претставници на деловните кругови од двете земји.
За прв претседател на БМТИК е избран Атанас Радев.
Во своето обраќање, Радев истакна дека со создавањето на комората се гради „темелот од бугарска страна на мостот“ меѓу двете земји, чија друга основа веќе е поставена од Македонско-бугарската стопанска комора.
Заменик-министерот Антон Костадинов оцени дека „мостот меѓу Бугарија и Македонија е речиси целосно изграден“ и дека сега треба да се доразвијат меѓусебните односи. Тој ја окарактеризира сегашната стоковна размена од 1,3 милијарди евра како „премала за потенцијалот на двете економии“ и ги посочи енергетиката, градежништвото, фармацијата, туризмот и земјоделството како сектори со голем потенцијал.
Амбасадорката Агнеса Руси-Поповска го поздрави отворањето на БМТИК како „јасен сигнал за обновена амбиција кон практичност и заемна посветеност“. Таа нагласи дека Бугарија е меѓу најзначајните трговски партнери на Северна Македонија и дека економските врски треба да се продлабочат преку взаемни инвестиции, индустриска соработка, иновации и заеднички инфраструктурни проекти.
„Треба да преминеме од трговска размена кон потесни меѓусебни односи“, истакна Руси-Поповска.
На настанот беше одржан и првиот „Бугарско-македонски бизнис-форум“. Од БМТИК најавија амбиција да организираат по два такви форума годишно – по еден во секоја од двете земји.