Станбено-деловните градби и градбите за колективно домување, кои ќе се изведуваат на локалитети и подрачја на кои постои техничка можност за приклучок на системот за дистрибуција на топлинска енергија, задолжително се проектираат и изведуваат со целокупната термотехничка инсталација на системот за централно греење, објави Фактор.
Ова е една од новите одредби во измените на Законот за градење кои веќе се доставени во Собранието. Како што пишува во образложението на законските измени, целта е да се овозможат „поквалитетни услови во снабдувањето односно користењето на топлинската енергија и подобра енергетска ефикасност, особено во поголемите станбеноделовни градби и градбите за колективно домување, како и унапредување на заштитата на животната средина преку намалувањето на бројот на станбеноделовни градби и градби за колективно домување кои користат различни видови за снабдување со топлинска енергија преку кои се испуштаат стакленички гасови и други видови материи во воздухот“.
Измените на законот, кои се носат на предлог на Влдата, предвидуваат дека за утврдување на можноста за приклучок на системот за дистрибуција на топлинска енергија потребно е инвеститорот да обезбеди известување од надлежниот оператор на систем за дистрибуција на топлинска енергија, дека постои или не постои можност за приклучок на системот за дистрибуција на топлинска енергија. За ова да го докаже инвеститорот треба да достави барање до надлежниот оператор на систем за дистрибуција на топлинска енергија.
- Мислењето за проектираната термотехничка инсталација на системот за централно греење на градбата се однесува на делот на основниот проект со кој е опфатена термотехничката инсталација на системот за централно греење во ревидиран термотехнички проект и се приложува од страна на инвеститорот со барањето за добивање на одобрение за градење – се нагласува во законот доставен пред пратениците.
Воедно е предвидено дека операторот на систем за дистрибуција на топлинска енергија, кој врши дистрибуција на топлинска енергија е должен известувањето за постоење на техничка можност за приклучок на системот за дистрибуција на топлинска енергија да го издаде во рок од 15 дена од денот на приемот на барањето. Додека пак во период од 30 дена треба да издаде мислењеза проектираната термотехничка инсталација на системот. Мислењето за изведената термотехничка инсталација на системот за централно греење во градбата го издава надзорниот инженер на операторот на систем за дистрибуција на топлинска енергија.
Воедно во овој закон се предвидува и преодна одредба во однос на изменатата постапка за добивање на овластување за изградба на електроенергетски објекти согласно новиот Закон за енергетика.
- Од причина што има затекнати постапки за добивање на одобрение за градење за изградба на ваквите објекти, за кои согласно Законот за енергетика кој престана да важи со денот на донесувањето на новиот, веќе има издадено овластувања, се предлага преодната одредба која се однесува само за оние објекти за кои има овластување согласно Законот за кој престана да важи. При што новиот начин на постапување за издавање на одобрение за градење за овој вид на градби е регулиран системски, со што се овозможува целосно усогласување на регулативата во делот на постапување за изградба на електроенергетски објекти, кои ќе отпочнат да се планираат од денот на влегувањето во сила на овој закон– се прецизира во законот.