Силен пожар денес избувна во село Душогубица, Кичевско. Поради сушата, како што објави Нова Македонија, ветерот и конфигурацијата на теренот, огнената стихија брзо се прошири речиси во целото село и се префрли во шумскиот појас над селото, каде сѐ уште е активно жариштето, а најзагрозено е едно бачило, сопственост на жител на Душугубица..
– Во раното претпладне во атарот на село Душогубица, Кичевско, избувна голем шумски пожар. Поради ветерот и големата суша пожарот со голема брзина се ширеше во селото, а го зафати и шумскиот појас во непосредна близина на селото. При овој пожар изгореа 45 сандаци со пчели, една постара куќа среде село и два полски тоалети. Благодарение на брзата интервенција на вработените на Лопушник, ТППЕ Кичево и хеликоптер на МВР, кој во шест наврати истури вода врз опожарената површина, и спречи пожар од поголеми размери, а најголема опасност постоеше за бачилото на еден од селаните каде се наоѓаа над 200 грла овци, оддалечено околу 2 километри од селото. Откако огнот успешно беше изгаснат во селото, истиот успеа да се префрли во северниот дел од шумскиот појас и постои реална опасност пожарот да го зафати бачилото на еден наш соселанец, кое се наоѓа на околу два километри од огненото жариште – истакна Димче Стојкоски, претседател на МЗ село Душогубица.