Изведбата на македонските народни песни кои ги пееле и свиреле нашите прадедовци и прабаби особено кога Македонија секојдневно е под силен меѓународен политички притисок и е бомбардирана од разни Лукасовци, Џејли и Азиси, е еден од столбовите на заштита на македонскиот идентитет.
Една од изведувачите кои ја води оваа битка за заштита на македонскиот културен и музички идентитет е Елена Андоновска која исполнува изворна македонска музика и не потсетува на богатотото лирско и нотно наследство што ни го оставија во аманет Васка Илиева, Вања Лазарова, Никола Бадев, Јонче Христовски и други великани на македонската народна песна.
Елена Андоновска за овој 15 Декември најавува голем солистички концерт во Македонската опера и балет.
Пејачката која ја промовира македонската музичка историја и посебност се очекува да приреди музичко – сценски перформанс во придружба на голем оркестар и повеќе од триесет македонски уметници на сцената.
Елена најавува вечер со звучна креативност, музичка магија, емоции, љубов кон народната песна.
Елена Андоновска е дама која од 14 години гордо ги пее македонските изворни песни и на која одлично и прилега македонска традиционална облека.
Со нејзиниот славејски глас ги интерпретира песните на македонските доајени на народната музика.
Веќе 16 години е амбасадор на македонските ора, танци и песни како член на „Танец“.
