Основното јавно обвинителство Скопје поведе истражна постапка против вработен во Дирекцијата за заштита и спасување, осомничен за примање поткуп во износ од 32.000 денари.
Јавниот обвинител веќе доставил предлог до судијата на претходна постапка за определување мерка притвор, а против осомничениот е отворена истрага за кривичното дело примање поткуп по член 357 став 1 од Кривичниот законик.
Осомничениот работел во Одделението за издавање урбанистички согласности и бил овластен да потпишува, дава мислења и издава согласности за просторни и урбанистички планови, проекти, како и елаборати од областа на заштитата и спасувањето.
Според Обвинителството, тој директно побарал и примил 32.000 денари за да даде согласност на елаборат кој не ги исполнувал основните услови за градба во делот на заштитата од пожари, експлозии и опасни материи.
Притворот е побаран поради опасност од бегство, можност за повторување на делото и ризик дека осомничениот би можел да влијае врз сведоци.
За случајот вчера информираше и директорот на Дирекцијата за заштита и спасување, Стојанче Ангелов, кој ја поздрави акцијата на МВР и Обвинителството.
Тој соопшти дека пред неколку дена граѓанин му посочил оти советник за урбанистичко планирање при ДЗС побарал 500 евра за позитивно мислење потребно за изградба на објект. Директорот го упатил граѓанинот веднаш да го пријави случајот во Одделот за организиран криминал при МВР.