Жител на тетовско Гајре им побарал 100 евра на мајка му и на сопругата, а откако тие одбиле да му дадат пари, почнал да ја крши покуќнината и со нож им се заканил дека ќе ги убие, соопшти тетовското обвинителство.
За него е поведена истрага и се бара притвор поради кривичните дела „загрозување на сигурноста“ и „телесна повреда“.
На 21 јуни, при вршење семејно насилство, осомничениот сериозно се заканил на неговата мајка и на сопругата, на кои најпрво им побарал 100 евра, а тие одбиле да му дадат пари. Со намера да ги вознемири и да ги заплаши жените, започнал да ја крши покуќнината и со нож им се заканил дека ќе ги убие. Сопругата ја удирал со тупаници по телото и ја влечел за косата, нанесувајќи и телесни повреди. Ценејќи дека се исполнети законските основи, јавниот обвинител до судијата на претходна постапка достави предлог за определување мерка притвор, соопштија од ОЈО Тетово.