Пишува: Свето Тоевски
Да фрлиме поглед кон целината на бугарските барања кон Македонија, оти „Бугари во устав“ е само едно од нив. Сосема јасно во врска со суштината на бугарските барања пишува статијата со укажувачкиот наслов „Бугарија бара од ЕУ да го сопре ‘лажниот‘ македонски идентитет“, објавена на 23.9.2020 година на порталот на „Дојче веле“. Во неа се истакнува дека Бугарија во „Објаснувачкиот меморандум за С. Македонија и проширувањето на ЕУ“, испратен до 26-те членки на ЕУ, наведува: „Луѓето со словенско потекло, што живеат во С. Македонија, се Бугари, кои зборуваат бугарски јазик. Ним за време на комунистичкиот режим на Тито во Југославија вештачки им бил даден нов ‘македонски’ идентитет и јазик. Проширувањето на ЕУ не смее да го легитимизира овој етнички и јазичен инженеринг“.
Д-р Томас Бреј: Бугарија бара Македонија да ја толкува поинаку својата историја, на начин прифатлив за Бугарија!
Во аналитичката статија со наслов „С. Македонија: Колку долго пред да може да влезе во ЕУ?“, објавена на порталот на „Дојче веле“, д-р Томас Бреј, доцент на Катедрата за политички науки и новинарство на Универзитетот „Дуисбург“, во Германија, наведува дека Бугарија бара Македонија „да ја толкува поинаку својата историја, на начин прифатлив за Бугарија“ и „три илјади припадници на бугарското малцинство во С. Македонија да се споменат како еден од ‘конститутивните народи’ во македонскиот устав“. Бреј посочува и дека официјална Софија бара од Македонија „да прифати оти македонскиот јазик не е посебен јазик, туку западнобугарски дијалект“ и дека „не постои македонско малцинство во Бугарија“.
Сегашниот македонски вицепремиер Александар Николовски уште во 2022 година изнесе став, свој и официјален на ВМРО-ДПМНЕ, која е денес на кормилото на македонската држава. – Со бугарските ставови и барања се загрозуваат македонскиот идентитет, јазик, култура и историја. Ако Македонија прифаќа бугаризација, ќе напредува кон ЕУ, но ако не прифаќа, што е став на огромното мнозинство од македонскиот народ, нема да напредува кон ЕУ – кажа тогаш Николовски.
„Триилјадно бугарско малцинство како конститутивен народ“ – уставен апсурд!
Уште во октомври 2021 година,Зоран Заев како тогашен премиер и Бујар Османи како тогашен министер за надворешни работи на Македонија, во нејзино име прифатиле Бугарите да бидат наведени во највисокиот правно-политички акт на македонската држава, и тоа не како малцинство, туку како нејзин „конститутивен народ“! Во информацијата со наслов „Заев изјави дека прифаќа најголем дел од бугарските барања“, објавена на 7.10.2021 година, македонскиот информативен портал „Република“ објави: „Бугарија издаде долга листа на строги барања насочени кон Македонија и Заев денеска брзо се согласи на едно од нив – македонскиот устав да се измени и Бугарите да се вбројат меѓу другите конститутивни народи на Македонија“.
Германскиот политички и медиумски експерт Томас Бреј посочи не случајно на формулацијата на тоа барање: „Три илјади припадници на бугарското малцинство во С. Македонија да се споменат како еден од ‘конститутивните народи’ во македонскиот устав“. Инаку, уставен и политички апсурд е да се бара три илјади припадници на малцинска група во Македонија, бугарската, да се споменуваат како „конститутивен народ“ во Уставот! Бугарија и нејзиното барање да се внесат трите илјади Бугари како „конститутивен народ“ во Уставот на друга држава, на Македонија, наспроти тоа што во Македонија има само еден вистински конститутивен, државотворен народ – македонскиот народ, што се потврдува и со решенијата на АСНОМ од 1944 година, споредбено го поврзуваме со Шпанија, развиена западна држава со мултиетничко општество, исто така.
Во научната студија со наслов „Демократско граѓанство и шпански мултинационален (не)поредок-растројство: процедурална демократија наспроти клаузула за отцепување“ од 2013 година, Хозе А. Санз Морено, професор по уставно право од Универзитетот „Комплутенсе“ во Мадрид, изнесува серија аргументирани предупредувања што значи постоењето „конститутивен народ“ во Уставот на една земја. Тој нагласува дека, ако едно национално малцинство добие статус како конститутивен народ во одредена држава, ќе има право на територијална автономија и на самоопределување до отцепување од неа, како и право на создавање своја нова држава. – Затоа во Шпанија националните малцинства не можат да претставуваат конститутивни народи – заклучува професорот Морено во својата студија.
Внесувањето на Бугарите во македонскиот устав како „конститутивен народ“ најмалку има врска со нивните малцински права. Тоа е отворање „мала врата“ за еден можен натамошен развој на ситуацијата во Македонија. – Малцинствата не би требало да бидат признавани како конститутивен народ, бидејќи ќе добијат право на сецесија, на отцепување – предупредува во научната студија со наслов „Меки граници: Преиспитување на суверенитетот и демократијата“ на Џулија Мостов, професорка по политички науки од Универзитетот „Њујорк“, во САД.