На денешен ден, 11 ноември 2001 година, тројца припадници на специјалната единица „Лавови“ ги положија своите животи во близина на тетовското село Требош, откако врз нив беше отворен оган од ракетни фрлачи и зољи.
Загинаа Драго Маневски, Бобан Трпков и Оливер Петрушевски — херои што ја бранеа татковината со чест и храброст.
Тројцата убиени со останатите припадници на безбедносните сили се упатија кон Џепчиште и требаше да извршат физичко обезбедување на гробницата за каде што постоеја сознанија дека се закопани шестмина од киднапираните и убиени Македонци. Заседата терористите ја поставиле од двете страни на патот, затскриени зад високите тополи засадени покрај патот. Конвојот на полициските сили бил нападнат со минофрлачи и зољи, а акцијата за извлекување на убиените и повредените траела до раните утрински часови.
Вечна слава и благодарност за нивната жртва.