Во Клиничка болница Тетово денес 28 доктори кои завршиле специјализација во оваа здравствена установа добија решенија за вработување на неопределено време. Потпишувањето на решенијата беше направено на церемонија на која присуствуваа директорот на тетовската болница Ерзен Елези и министерот за здравство, Азир Алиу.
Директорот Ерзен Елези потоа на прес-конференција за медиумите истакна дека овој е прв конкурс за вработување на специјализанти, а во тек е и втор, со кој ќе се вработуваат уште доктори.
– Специјализантите во нашата установа Клиничка болница Тетово биле на различни специјализации како ортопедија, неврологија, хирургија, гинекологија, физикална и друго. Нашата Клиничка болница има потреба уште за специјализации. Во министерството за здравство има уште еден конкурс за вработување на нови специјализанти, имаме потреба за одделите за инфективно, хематологија, рендген и хирургија. Мислам, со овој (н.з втор) конкурс ќе бидеме 100 посто покриени со нови специјалисти, истакна Елези.
Министерот за здравство Азир Алиу, посочи дека човечките капацитети се значаен елемент од здравствениот систем, и затоа нема да се остане само на овие 28 вработувања на специјализанти.
– Втората фаза заради локалните извори беше во мирување, ние продолжуваме. Директорот продолжува со административните процеси понатаму и за кратко време тие ќе бидат завршени. Исто така многу наскоро ќе биде отворен конкурсот за нови специјализанти. И после вториот конкурс исто така ќе имаме потреба од нови доктори бидејќи европските стандарди налагаат на 100 000 жители да имаме одреден број на доктори, коишто, за жал кај нас сè уште сме далеку од таа оптимална бројка, така да ќе инвестираме и понатаму во вработувања и човечки капацитети во здравството, рече Алиу.
За медицинските сестри, болничари, технички кадар и администрација кои работат со договор на дело, директорот Елези најави дека следуваат интервјуа и за најмногу две недели ќе се заврши процесот за нивно вработување на неопределено време.