Администраторите на Фејсбук профилот на Американската амбасада во Скопје објавија дека се прекинуваат објавите се додека не продолжат во целост соодветните операции.
Засега од амбасадата најавуваат дека ќе бидат објавувани само итни информации за безбедносни прашања.
,,Поради прекин на асигнации, оваа сметка нема редовно да се ажурира додека целосните операции не се продолжат. Ажурирањата ќе бидат ограничени на итни информации за безбедност”, стои во објавата на профилот на Фејсбук на американската амбасас во Македонија.
Објавата се однесува на проблемот со блокадата за финансирање на
Владата на САД откако претседателот Трамп и Конгресот не успеаја да постигнат договор за финансирање.
Не е јасно колку долго ќе трае затворањето, бидејќи партиите не се ни блиску до договор. Демократите сакаат пари за здравствена заштита, додека републиканците инсистираат дека нема да бидат „заложници“ на барањето на Демократите без кои законот за финансирање на владата не може да помине во Конгресот.
Владата на САД официјално се затвори ноќеска на полноќ откако Конгресот и Белата куќа не успеаја да постигнат договор за тоа како да се продолжи федералното финансирање.
Републиканската партија на претседателот Доналд Трамп ги контролира двата дома на Конгресот, но ѝ е потребна поддршка од демократите за да донесе закон во Сенатот, каде што се потребни 60 гласа. И двете партии не успеаја да изготват двопартиски закон, при што Сенатот ги отфрли и предлогот на Републиканската партија и предлогот на демократите само неколку часа пред рокот за затворање.
Ова е првото затворање на владата од 2018 година, во првиот мандат на Трамп, кој беше најдолг досега, 34 дена, и траеше до почетокот на 2019 година.
Засега не постои јасен излез од кризата, при што двете страни се радикални во несогласувања околу тоа како да се реши ќорсокакот.